Monday, February 14, 2011

Picasso í fokus


Nú  heldur onkur spentur lesari kanska, at Picasso verður sýndur fram í Galerie Focus, men so er ikki. Hjá Marionnu í Focus er framsýning hjá Jónu Rasmussen at síggja í løtuni og seinni í februar verður Amariel Norðoy á skránni. Nei, orsøkin til at Picasso er í fokus er, at nógvar framsýningar vísa at áhugin er stórur fyri heimskenda listamanninum í løtuni.

Modernistiski meistarin Pablo Picasso (1881-1973) rúgvar so mikið væl upp í listini í 20.øld, at tað næstan tykist óyvirlítandi og strævið, men bara inntil tú hyggur at teimum einstøku verkunum sum altíð eru góð og áhugaverd. Listasøguliga er hann kanska serliga kendur fyri kubismuna. Hetta ómetaliga týdningarmikla listarákið, sum hann fann uppá í 1908 við myndini "Frúnnar úr Avignon", sum vit hava skrivað um her á blogginum áður. http://listinblog.blogspot.com/2010/08/frammanfyri.html
Men Picasso fann uppá nógv annað kollveltandi.



Bæði MOMA í New York og Louisiana í Humlebæk hava stóra spanska flogvitið á skránni í løtuni og av tí, at hansara verk er so mikið stórt og fjølbroytt sum tað er, at talan er um tvær sera ymiskar framsýningar. Í New York sýnir MOMA fram kollveltandi gittarasamansetingarnar, sum Picasso gjørdi frá 1912 til 1914. Hesar kvirru tulkingar av einum ljómandi leikføri vóru eitt slag av standmyndum ella assemblage, sum heimurin ongantíð áður hevði sæð.




Heitið á framsýningini í Louisiana er Friður og frælsi og tekur støði í politiska áhuga Picassos. Tað er eitt sindur merkiligt, tí sjálvt um eg sjálvandi kenni friðardúgvuna og fleiri aðrar tílíkar politiskt engasjeraðar myndir hjá Picasso havi eg ongantíð uppfata hann sum politiskan málara og tó. Ein mynd sum Guernica er ómótsigandi atfinning av kríggi og sum so eitt politiskt verk við universalum boðskapi. Óansæð hvør áskoðarin er - um hann er ungur ella gamal og óansæð hvørji mentan hann tilhoyrir - fatar hann boðskapin í myndini um ræðuligu líðingina, ið stendst av yvirgangi og harðskapi, sum rakar ósek menniskju í krígshøpi.

Eitt av mongu sitatunum frá Picasso ljóðar: "Málningar verða ikki skaptir til at pynta veggir við, men sum eitt verndar- ella álopsvápn móti fíggindanum". Picasso var sosialt sinnaður og samfelagsligt áhugaður. Hann var friðarelskandi maður og teknaði eitt nú friðardúgvuna, ið prýddi steinprentið, sum var brúkt til plakat á friðarráðstevnuni í 1949.









Kobberstiksamlingen í Keypmannahavn hevur somuleiðis eina ómetaliga spennandi framsýning við heitinum Picasso. Fortællinger fra labyrinten, sum m.a. snýr seg um ta sonevndu Vollard suitina frá 1930´unum og tann serliga ókronologiska frásøguháttin hjá Picasso. Hugtakið tíð er yvirhøvur sentralt tema í verkunum hjá Picasso og soleiðis er eisini við myndunum á hesi framsýningini. Framsýningin letur skjótt aftur, men verk hjá Picasso eru partar av teirri áhugaverdu permanentu framsýningini hjá Kobberstiksamlingini, ið er myndað av tilsamans 240.000 grafiskum verkum.

 MOMA NY Picasso: Guitars 1912–1914 inntil 6.juni 2011

Louisiana Humlebæk: Fred og frihed inntil 29.mai 2011

SMK, Kobberstiksamlingen Keypmannahavn: Picasso. Fortællinger fra Labyrinten inntil 27 februar 2011
(KP)










Al god kunst er politisk, al politisk kunst er dårlig'