Wednesday, October 20, 2010

Tíðindaskriv: Hanus Kamban í Norðurlandahúsinum

Hósdagin tann 21. oktober kl. 16 verður bókin GULLGENTAN eftir Hanus Kamban løgd fram í Norðurlandahúsinum.

Bókin er eitt savn við tíggju stuttsøgum. Høvundurin hevur hildið til í Freiburg í Týsklandi tað seinasta árið, og tær flestu av søgunum eru skrivaðar har. Tekstirnir umboða eina snaring í Hanusar søgukynstri, soleiðis at skilja, at lesarin í teimum verður leiddur út ígjøgnum veruleikans dyr – og inn í dreym, søgn, ævintýr og framtíð.

Permumyndin er eftir ta ungu listakvinnuna Silju Strøm, sum somuleiðis hevur tríggjar myndir inni í bókini.

Tiltakið er skipað soleiðis, at høvundurin fyrst sigur nøkur orð um bókina og um sítt uppihald í Freiburg. Síðani lesur hann nøkur brot upp. At enda fáa fólk høvi til at seta spurningar. Fólk fáa somuleiðis høvi til at keypa bókina fyri ein lagaligan prís. Um fólk vilja, setir høvundurin sín autograf í bókina.

Øll eru vælkomin. Tiltakið, sum er ókeypis, varar o.u. ein tíma.